أخبار-ثقافة -فكر دينى – فنون – أثار
قريب رائع
وله طيبه طبيعيه
تكون في وصفها محتار
من الممكن
تقول مركب
وبيعدي بسلام للشط
وهوه مخالف التيار
وكنت اروح له دكانه
وياما مشيت معاه مشاوير
ورحنا كنيسه بنبارك
لمينا ابن عم بشير
وكانوا بيسعدوا جدا اذا جاهم
وعارفين ان قلبه كبير
وفي زياره مشتها معاه لاهل البيت
حكي لي عن قدومهم مصرنا الغاليه
في يوم رائع
كانه عيد من الاعياد
وازاي ان احفاد الرسول صوره
تشرف معني الاستشهاد
وصدق الحب في كلامه
هيوصلك تكون حبيت
ووسط دموعه في الاخر
هتتاثر وتبقي بكيت
ورحت معاه لسلفيه
وزرنا اخوان
كمان صلينا في طريقنا مع اصحاب
بيعاونوا مع جمعيه شرعيه
وكان الكل عارفينه
بانه صادق النيه
وكان مركب
وحضنه للجميع سايع
اصيل في معدنه شاري
ومش بايع
واقول لاولادنا من بعده
بان نبينا له اسماء
محمد
مصطفي
محمود
وله اصحاب علي خطه
ولو تمشي ورا واحد من اصحابه
هتوصل سكه المعبود
ودينا بسيط في احكامه
واذا اختلفت ارائنا فيه
هتمشي اكيد حسب قلبك والهامه
والهامي عليه يجود
بان طريقي في فهمه
خطاوي جدكم مسعود