أخبار-ثقافة -فكر دينى – فنون – أثار
هي فعلا اللي بنشوفها في المسلسلات دي مصر ودول أهل مصر واللا الناس دي من شيكاغو وبيمثلوا في شوارعنا؟
باستثناء أدوار قليلة قوي لفنانين محترمين تكتشف إننا ما بقيناش نقدم دراما ولا فن.. بقينا بنقدم إجرام وبلطجة مكانها الوحيد برنامج تمثيل الجرائم..
الظاهر إن الموضوع كله بقى ألماني.. من حق محمد رمضان يطلع في إعلان اتصالات يقول بيقلدوني..
المشكلة إن انعكاس ده على الشارع كارثي.. أنتو كده بتعدوا أطفال مجرمين مش فنانين..
إحنا جيلنا اتربى على ليالي الحلمية وأرابيسك والسبنسة وغوايش والمال والبنون والراية البيضا والنوة وجمهورية زفتى وخالتي صفية والدير وذئاب الجبل والضوء الشارد وزيزينيا والمصراوية وأميرة من عابدين ومسلسلات يحيى الفخراني من جابر مأمون نصار ل الخواجة عبد القادر و……… ……. ……. أقدر أعد مسلسلات محترمة للصبح.. ما شفناش اللي بيحصل ده.. كانت القناة الأولى والتانية بس وكانوا نعمة.. كان أجدد أفلامهم إسماعيل يس في الأسطول.. وكنا زعلانين إنهم ما وصلوش لبخيت وعديلة بس كان زعل خايب.. يا ريتهم فضلوا على ماهم..
كتر الذرية فساد صحيح بس لو الذرية الكتيرة اتربت كويس هتعمل نقلة لعيلتها على كل المستويات…. الفساد بقى كتر القنوات وكتر الدجل والنصب وكتر الغباء والجهل وكتر القسوة اللي خلت الناس تقعد تتفرج على الحاجات دي وهي حاطة رجليها في ميّة باردة..
……..
دي مش ثقافة عصر.. دا عصر ثقافة مجتمع في خلاط الضياع للأسف الشديد
……..
ويا ريت ما حدش يقول لي اقفل التليفزيون أو غير القناة.. علشان دي حلول ضعيفة ومالهاش أي مدلول سوى الضعف.. لو قفلت التليفزيون مش هأقفل النت ولو قفلتهم الاتنين مش هأقفل أبقاق الولاد اللي شافوا وبيحكوا لزمايلهم… الأزمة كبيرة ومحتاجة حلول فعلية لأن المجازر التليفزيونية ملت الشوارع…
إحنا في خطر يا أهل شيكاغو