أخبار-ثقافة -فكر دينى – فنون – أثار
ياميت ندامة ع الولد
اللى اشتغل نصاب
بدل ما يسعد بلاده
عايش حياته عذاب
العمر بيضيع هدر
من غير مايلقا جواب
يهدى الحيارى ف بلد
ووراه جماعه هباب
رامى الحمول على مين
وسألت ع الأسباب
محتاج دليل ينصحك
يفتح معاك أبواب
يمنع هروب الأمل
ومعاه صحاب واحباب
اوعاك تغرق بلادنا
ف صراع وخوف ويباب
يابن البلد شوف أوطانك
محتاجه منك كشف حساب
مسكين يا صاحبي ازاى حالك
أصبح عدم والخوف غلاب
ضاع الأمل ليه ضيعته
وصبحت من غير أنياب
افتح بيبان الخير واوعى
يوقف مسيرتك ميت بواب
قبل الطريق مايضيع منك
و يكلفك تدفع أتعاب
وقت الأمان هو الباقى
ما خلاص نسينا شريعة الغاب
لا عنف راح يفضل بيننا
ولا فوضى راجعة مع الإرهاب
اوعاك تعيش في البلد
تايه كما الأغراب
يارب تنصر بلادنا
من فوق سما وسحاب
قادر تنجى البلد
من كل فكر سراب
وف نفسى اشوف الخير
أسراب ورا أسراب
يارب انت الأمل
من غير شكوك ورياب
قادر تعيد حقنا
بعد ما قلنا غاب
نفسى الشباب ينتفض
من غير زواق كداب
يايعيش ويحمى الوطن
يايموت ولا نقول خاب
شعر/عيد حميدة