(هل الهلال بالخير)..شعر.د.مختار أحمد هلال

لما أراد الحق…………………………….ينعم علينا بحق
أرسل لنا أحمد……………………….يهدى جميع الخلق

أنزل كتاب معجزه…………………..للعالمين موعظه
يتحدى بيه البشر…………………بعباره فيه موجزه

رؤيا الهلال اليوم………………والناس مناها تصوم
تستنى طبله تدور………………ع الدور وكله يقوم

هل الهلال بالخير………………أغلى حبيب وبشير
الناس قلوبها خلاص………….. من فرحها هتطير

فرحه فى كل مكان………………ومساجد الرحمن
بيلالى فوقها النور……………………عمرانه بالقرآن

يارب دى حكمتك………………فارد جناح رحمتك
قافل بيبان النار ……………………..فاتح لنا جنتك

بتذكر الغافلين……………….ومسلسل الشياطين
فاتح بيبان الخير…………….. والتوبه للعاصيين

وحوى العيال غنت………..بالشوق ياما استنت
قايدين فوانسهم………………….وقلوبهم اتهنت

محلى قدوم رمضان …………بالرحمه والغفران
شهر الكرم والجود………………والبر والإحسان

الزينه فوق الدور……………….وف كل شارع نور
كل الخصام ننساه ……………ونروح لبعض نزور

شهر الصيام محلاه………………….الله عليه الله
رب الوجود عظمه…………….فوق الشهور علاه

أغلى الشهور رمضان……………ومشرفه القرآن
الذكر رحمه ونور …………..وشفاء من الأحزان

رمضان يا وش الخير……..فيك الصيام تطهير
كفاره للصايمين……………….من كل ذنب كبير

يا شهر كلك نور………………الكل فيك مسرور
إن كان فقير أو غنى………..الكل فيك مجبور

فيك الفقير فرحان………………بموائد الرحمن
مطرح مايمشى الخير……يلقاه فى كل مكان

فى كل بيت فرحه……….شجرة حنان طارحه
ساعة الفطار لمه…………….رغم الزحام برحه

الخير كتير موجود ………من عند رب الجود
ان كان لحوم أوفول..شاكرين على الموجود

عينى عليك يا ياميش….نافش علينا الريش
أشكال على ألوان……بس المعامله ما فيش

عين الجمل والجوز….وقراصيا حلوه ولوز
اللى اشترى فرحان…..وانا اللى ضارب بوز

بحلق أوى بحلق………………..برق عنيك برق
ع السعر ماتبصش……………..هتبصله تعرق

غمض عنيك واحلم…………حلم الفقير بلسم
اهبش كتير واكبش……….فى الحلم واتنعم

يا صاحب الملايين…اعطف على المساكين
ارحم عشان يرحمك…..ربك فى يوم الدين

يا مسحراتى قول……..ع الطبله والأرغول
مش باقى غير الله……كل الوجود هيزول

رابح بفعل الخير……..لو حتى يبقى يسير
عند الكريم مايضيع………تلقاه ثوابه كبير

جايلك يا ظالم يوم.ماتدوقشى فيه النوم
ما فى حجاب يمنعك….يا دعوة المظلوم

يا نايم اصحى وقوم..خليك خفيف النوم
كل اللى فوق الأرض..زايل ومش هيدوم

الرزق رزق الدين………..والجنه للصابرين
الشهر شهر ثواب .مش عين جمل ولا تين