أخبار-ثقافة -فكر دينى – فنون – أثار
ويحيا الحلم في فلسطين ولد
….. خالع هدومه وماشي بحجاره
وتعيش ملامح بكره أرض ونار
ونغني رغم حصارنا في الغاره
المجد للبنت اللي بتحب الربيع
المجد للواد النبي الشاعر
المجد للحاره اللي بتطلّع شجر لابس هدوم حمرا
للقنبله المسطوله م الخمره
للتمره في البق الجعان والبطن مشقوقه
للطين حنين ولكل دار شوقه
ولكل طرح معاد
ولكل بيت تم احتلاله ولاد
نايمين في جدرانه
ادن يا ربان السما واصفح
واسمح لطيرك يملا أغصانه
الفرحه في عيون الملايكه لسه ما شوفنهاش
والغنوه للشهدا اللي راحوا ما قلنهاش
والكلمه طاشت في الميدان ولا حسّهاش المعني بيها وداقها بلسانه
المجد للأسفلت وعيدانه
ولقطر ماشي وناسي عنوانه
ولطفل شايل روحه ومصمم يموت راكب على حصانه ف ساحات الصبر والأوجاع
المجد للست العجوزه على الرحايه الدايره ع الطوب والحصى والرمل وعضام العيال المحرومين من نور نهار راح للسما وما رجعش لما اتباع
سامحيني يا فلسطين ما زال جوايا شيء بيخاف من الساسه
سامحيني لسه ف قلبي عرق ضعيف
لسه ف ملامح وشي رعشة عبد بيغني لوريث العرش وسيادة الخازوق
لسه ف إيديا كلام كتير ما سمحتلوش يظهر على هيئة مصارع أو أسد أو نمر أو تمساح
لسه ف قصايدي براح ما هوش واخد براحه ف حضرة الكارهين
لسه ف قميصي زرار ما لوش لازمه
لسه اليمين معقود على الأزمه
لسه اللي منشور مني فوق ورق الجرايد صوته غير صوتي
مين سايب المحتل في بيوتي..
مين اللي واهب للغريب قوتي وذاللني معاه
الناس طفح بيهم وفاض بالخلق يا الله
والأرض ضجت بالوجع والصمت
لسه ف صوابعي سلاح بيتدارى
لكني بقلبي عرفت واتعلمت
وقدرت أقول للناس تعيش الأرض ولاده بقصايد كلها شبه العيال الموهوبين لبنادق الأعمى
عاش التراب جوا الرحايه رغيف وكرباج وابتهال للرب ورصاصه
عاشت إيدينا تملي متعاصه بضفاير دمهم ومتبته ع الطين وع الورده
عاش الحصى زي الرصاص في قلوبهم البارده
تحيا الحياه حريه في بلاد الحياه والفرحه دوّاره
تحيا المعاني الطاهره في فلسطين ولد
قالع هدومه وماشي بحجاره