أخبار-ثقافة -فكر دينى – فنون – أثار
قلت للصيدلى:
— الكمامات اللى اشتريتها منك أمس غير مطابقة وليس بها سلك لإحكام غلق منطقة الأنف.!
الصيدلى:
— أحنا معندناش غيرها !
طارق :
— أوكية رجعها
الصيدلى مخاطبا زميلا له:
— هو ينفع نرجع كمامات؟
طارق :
— طبعا ينفع لما تكون كمامات غير مطابقة لازم ترجعها .
وبعدين شوف يا أخى انت لابس كمامة محترمة ومحكمة ازاى وبتبيع لنا اية ؟
الصيدلى :
— دى ماما هى اللى عملتها لى !!
طارق :
— طيب يا أخى خلى مامتك تعملنا كمامات زيها ونشتريها وتكسب ثواب .
الصيدلى مخاطبا زميله:
–خلاص رجع الفلوس للأستاذ واديله الكمامات مجانا !
طارق :
— لا طبعا مجانا لية شايفنى بطلب احسان؟! وبعدين اعمل بيها اية دى كمامات مضروبة بتنقل الفيروس مش مفروض انك تبيعها اصلا ! أنا لابس كمامة محكمة من صيدلية تانيه وانت كمان مامتك عملتلك واحدة محكمة …بتبيع دى ليه وجبتها منين ؟!
الصيدلى مخاطبا زميله:
— طيب رجع له الفلوس .
طارق:
–لا هات بتمن الكمامات فيتامينات سى وزنك وبى .
فى هذه الأثناء احد الزبائن الشباب لم يراعى المسافات ولامس كتفى !
طارق :
— حاسب يا أخى
الشاب :
— الله ما انت لابس كمامة وجوانتى اهوه اعملك اية ؟!
طارق: ايوه بس انت مش لابس أى حاجة،وأنا عندى شك إنى مش سليم تماما، خفت اعديك.
الصيدلى وزملاؤه نظرو إلى برعب وشك !
الشاب :
— خليها على الله
وضع الصيدلى الفيتامينات التى طلبتها على الكاونتر ولم يضعها فى كيس حتى! ،ودخل زبون لأجده يحمل فيتاميناتى ويقدمها لى فصرخت فيه:
— انت بتلمس ادويتى ليه؟! انا طلبت مساعدتك؟! شايفنى عاجز؟! انت إيه؟! بطلوا العاطفية الزائفة دى ..حرام عليكم …ثم خاطبت الصيدلي:
–وحضرتك مش المفروض تحط الفيتامينات دى فى كيس ولا اية !!! دى بتاعة الفجل بتحطه فى كيس !
التفت فوجدت طابورا خلفي وهناك فتاتين متقاربتين جدا .
طارق :
__ انتوا مش سايبين اى مسافة يا بنتى ؟
الفتاة :
— اصل البنت اللى قدامى صحبتى فالفيروس مش ها يقرب منها ! وضحكت !!
خارج الصيدلية قمت برش الفيتامينات بالكولونيا وانا على يقين من أنه اذا كان ده سلوك الناس فى حى متوسط مثل حى المنيل امال فى الاحياء الشعبية ها يحصل ايه .!؟
وانا بالخارج خرجت الفتاتين وودعتا بعضهما بالقبلات والأحضان .!!!!!
طارق :
— اية ده هو انتوا جايين الصيدلية تنقلوا الفيروس لبعض ولينا وتروحوا !!!
أدركت أنى مش ها أموت بالكورونا ، لكن بالضغط والسكر ويمكن أتنقط !!!!
(حدث بالفعل ولم ارغب فى ذكر اسم الصيدلية رحمة بهم .)